Više od dvadeset ljudi povrijeđeno je danas u neredima u gradu Tripoliju na sjeveru Libana, uključujući pet vojnika ranjenih ručnom bombom, dok raste napetost u toj zemlji suočenoj s ekonomskom krizom bez presedana.
U Tripoliju, najsiromašnijem i drugom po veličini gradu u toj zemlji, stanovnici su gnijevni zbog rasta cijena, dugotrajnih isključenja struje, nestašice goriva i ljekova.
U Bejrutu su demonstranti nakratko zatvorili nekoliko glavnih ulica, ali su ih vojnici brzo otjerali, a blokirali su i autoput.
Poslije jučerašnje ostavke mandatara Saada Haririja koji ni za devet mjeseci nije uspio da sastavi vladu, Francuska, Evropska unija i SAD su pozvale libanske političare da to hitno učine i najavile međunarodnu konferenciju da bi pomogle da se Liban stabilizuje.
Šef diplomatije EU, Žozep Borel, rekao je da su libanski lideri odgovorni za rešavanje “domaće krize koju su sami napravili”, a da je sporazum sa Međunarodnim monetarnim fondom ključan za spasavanje Libana od finansijskog kolapsa.
Francuska je uz podršku UN pozvala na međunarodnu konferenciju 4. avgusta, na prvu godišnjicu ogromne eksplozije u bejrutskoj luci u kojoj je poginulo 200 ljudi i povrijeđeno 6.000, i razoreni su čitavi kvartovi glavnog grada.
Liban od tada nema funkcionalnu vladu, niti je završena istraga te eksplozije 2.750 tona vještačkog đubriva amonijum-nitrata, godinama nepropisno usladištenog u luci, uz znanje najviših zvaničnika.
