Generalni sekretar i poslanik Demokratske Crne Gore Boris Bogdanović kazao je da popis nije niti kazna, niti nagrada, već obaveza.
“U duhu transparentnosti i objektivnosti, smatramo popis stanovništva, domaćinstava i stanova kao ključno sredstvo za prikupljanje statističkih podataka koji služe dobrobiti naše države. On nije samo tehnički postupak to je refleksija naše posvećenosti pravoj slici naše države i njenih građana. To je temelj na kojem planiramo budućnost, a ne teren za političke igre.
Zato smo donijeli odluku da se ne uključujemo u kampanju za predstojeći popis. Politika ne bi smjela zasjenjivati čistotu i objektivnost statistike. Apelujemo na naše građane da sačuvaju integritet ovog procesa i da se odupru svakom obliku pritiska i manipulacije na njihovu vjersku i nacionalnu pripadnost. Vaše slobodno izjašnjavanje je vaše pravo, a ne nešto zbog čega bi trebali osjećati strah, biti kažnjeni ili pak očekivati nagradu.
Vaše slobodno popisno izjašnjavanje je vaše neprikosnoveno pravo i svjedočanstvo naše demokratske zrelosti. Svako miješanje političkih subjekata u ovaj proces je narušavanje svrhe popisa i pokušaj manipulacije stvarnom slikom našeg društva, te aktivan pokušaj kompromitacije statističkih podataka.
Želimo Crnoj Gori objektivan i iskren popis, jer samo na istini možemo graditi svijetlu budućnost naše domovine”, saopštio je Bogdanović.
