Dalas Maveriksi izborili su plasman u veliko finale NBA lige pošto su u finalu Zapada počistili Minesotu Timbervulfse u petom meču 124:103. Maveriksima je ovo treće finale u istoriji te prvo od 2011., kada su jedini put osvojili naslov.
Maveriksi su brzo poveli sa 18:8,a do poluvremena prednost je porasla na ogromnih +29.
Na drugoj strani, Minesota nije djelovala ni nalik onom timu za koji, sada već bivši šampion Denver, nije imao rješenja.
Tako, Dalas je dolazio i do najveće prednsoti +36, pa je jasno bilo da u ovom meču “vukovi” nemaju šta da traže.
Najbolji pojedinci na ovom susretu bili su Luka Dončić i Kajri Irving koji su postigli po 36 poena.
Dončić je ovim učinkom postao prvi košarkaš u istoriji NBA lige koji je u plej-ofu ostvario po 150 skokova i asistencija i pogodio 50 trojki. Naravno, nakon utakmice proglašen je MVP-om konferencijskog finala.
Nakon što je isprozivao sve u dvorani, računajući i repera Snup Doga, pa zakazao veliko finale sa Boston Seltiksima, Luka je na miru popio pivo u društvu oca, Saše Dončića.
Minesotu su predvodili Karl-Entoni Tauns i Entoni Edvards sa po 28 poena.
Finalna serija NBA lige počinje sedmog juna kada će Boston biti domaćin. Druga utakmica je na programu 10. juna, a zatim se serija seli u Teksas gdje će Dalas biti domaćin 13. i 15. juna.
Izvor: RTCG
